لو بستاهل

ولو بستاهل
خلى الفى أيدك
وقفي نبضك
البسي حسك
خلى الشارع ألبينك وبينو ضفاف وشتول
ارفعي راية الضحكة العالية
واكتبي فيهو لذيذ القول
شمي النكهة
وانتى في أيدك جيتو
كلمى كل زفراتك تدق طبول
وتغنى معانا
جاييك جاييك يا احسن زول
لو بستاهل
كلمى عبى عبير الوردة
عشان تستني
ورى وريد النسمة عشان تتمنى
يا مسكونة بى دفء الجاى
لو بستاهل غنى وغنى
دندنى دندنى
ازرعي سكة زولك بسمة وهمسة
واحلي فصول
جاييك جاييك يا احسن زول
ترسمني في مرتع خيلك فرس رهان
يا مسكون بى حب الحرف النابض
يا مرسوم فى فجر الكلمة الجد
تمتم اسمك
صداك مكتوب فى لوح أيامنا غنى
يا ميلاد البسمة الزادت فينا مسارب الضو
يا فجراوى معدى ورايح وكايس أحلامك بينا
مدد كل الزمن العشتو عشان تلقانا
وسد منافذ الفشل البارك لينا
ويا إنسان افرش سنواتك فى صحوات الضل
وافرد كل جنحاتك شم الفل
ضوى معانا الزمن الجاى
وايدك فى ايدين الكل
وخلى الضحكة تترعرع بينا
وتهزم كل عناصر الذل
لو بيستاهل عدى ضفاف البهزم ليل البعد البينك وبينها
وخت فى بالك
انو الجالك
فالك
يا مرسومة بعطر الصندل فى شريانى
يستر حالك
بتمنالك
كل الزين ياحليوةيا المعدومة مثالك
هاكى حروفي تسيل فى مسامك
نبضك يرجع نبضي وتاج شريانى
لا بعرف أوصاف دمى العابر من دمك
ولا بقدر افرق حنك من تحناني
إنا أصلى معاكى يا روحي بكونك
وحتى بدونك بلاكى بتكون ماليانى
ولو مديت شراع الفرحة فى جواي حتلقى مدن مشرورة فى عيني غنى وموال
ولو حاولت ترسم زول بدون ذكرى زول مرسوم موسوم على التجوال
حتلقانا المسام الشهقة والمدى والنسيم
حنقذف فى شتول الريد حروفنا عشان تكون أجمل من الأوحال
لو بيستاهل
ما تستنى عشان ما تمر اللحظة بدون عينيها
اركب صهو مدادك زهرة
ضم أيدنها على أيدينك
وغطى مرادك بيها
ما تستنى كتير فى الشارع
هي الأحلام مابتسوى فتات من غيرها
يا مكتوبة على جدران قلبي عيونك
إنا مستني مجيك بى لهفة لانى غريب من دونك
وكونى بغنى بدونك
بس من غلبي وعلب اللحظ الليك مستني
وكل غناي عليكى يا حلوة تقول لك يا ريتنى أكونك
يا مكتوبة بنبض القلب
ما تنسينا وتتابعي ظنونك